Valter Primožić Stiskarjev

vijesti_21291_vRojen na 18. moja 1953. leta od oca Franca i matere Đine, zgojen s braću Vincenton i Mladenon, celi život je paso tu na Kršonšćini. Oženi  se je za Nadiju i dobi sina Noela. Fameja mu je štabela kako ča je i on bi. Ljudi Valtera pamete po dobren daš je bi vajka provi i vredan čovik . To najbolje znoju preteli, susedi, kolege od dela, fameja i drugi ki su s njen bili. Mi od Zlatele smo imali sriće da više vrimena budemo z njin i sad kapimo da je to bila jena vela srića.

Pred 20 let je poče proučavat i delat naše starinske istrijonske instrumente. Interešo se za starinu, sop, kanat i tanac keh čuda let na Kršonšćini bilo ni, kako provi veri Istrijon. Z Đordaneton i Čedeton poče je sos, a instrumenti ča je stori najbolji su bili na ke se soplo i sope od kad Zlatelovih sopelah ni. Mihi, sopele, volarice, sopelice, šurle, klarineti samo su niki od instrumenti na ke sopci po celen svitu, sopu. Ki ih je jedon put pravo, tajsti se je vajka poli Valtera torno.

S trinajst njih osnova je Kud Ivan Fonović Zlatela i vodi ga deset let. Radi Valtera smo postali jeno od najboljih folklori va Istri i Hrvockoj. Navadili smo sos na sopele, kantat na tonko i debelo, sos trieštinu i bajs, toncat store plese… z vrimenon se je i nošnje storilo. Pasali smo pol Hrvocke i Europe, a ča nismo siguro ćemo. Koliko je samo kilometri skupa z Moteton paso, to najbolje znoju oni dvo.

Delali smo se ča drugi nisu zato jer smo Valtera imali. Od Velih sopelah, Kršonskega pira, trostrukega audio albuma Vrime je, rekonstrukcije ženskega rušnjaka do Pod ćorice… još je čuda tega. Mi najbolje znomo koliko dela, truda i muke je uloženo.05_1214zlatela

Bilo je lipo s Vami delat i va kumpaniji bit i zato Van od srca fala. Takovih kako ča je Valter bi, malo je i zato Vas nikad nećemo zobit. Ala, rečimo i da se je zno najodit, ma samo ku smo zameritali, kad smo štupidece i čine začinjali. Si od naše kumpanije, od najmlajih do starijih, su ga imali rada. Vajk je dava lip primjer. Mogli smo od Valtera čuda navadit na saken nastupi, saken našen druženji i fešti. Prerano se je trefilo da ga je dragi Boh ze poli sebe. Joko nan fali i nećemo više bit ono ča smo bili, ma saki od nas na svoj način na srci Valtera drži. Ostaje vela praznina, ma si dajemo kuraja daš verujemo da će Valter i na onen drugen svitu brzo noć kumpaniju i da će vrtat sopele, sos i kantat po domoće.

Velo fala fameji Primožić ča je imala toliko strpljenja i podrške za se te ure ča je Valter na Zlatelu troši, za sve dneve kad ga radi Zlatele doma ni bilo, za sve projekte, snimke, pohotke, za se muke i probleme ke je radi Zlatele imo. Velo Van fala!

Dragi barba Valter,

va ime cele kumpanije od Zlatele, fala Van za sve ča ste za nas stori. Magari, to fala se z besedami ne more zreć, previše ste tega za nas stori. Teško je ne pustit suzu kad se na Vas spamentimo.